அவர பல்கீஸ்து டடாகு பாண் சொடியசுன். அவர மேங்கான் பாண் சொன்னோ மெனத் பாபு காம் ஜனோ. ஹாத் போர் காஸ் அணி தேனோ. தேகோ சிங்கதினுக் ஹோராத் மேனி ஜீலி அவனோ. தேலாதுகுஸ் அம்போபான் மோட்டோ மோன்னு தோவி பாபு மெல்லி ஹோராத் ஹோத்தோ ஒஸ்சு அவ்டியோ மெனி பாண் சொடன். தெள்ளமாம் பபுக் திசீன் பெடிக்கின் வேற ரீடியாஸுண் மேநதி தொன் ஹுடி ஹோராத் கெரி தொவோ மேனறியோ வரை பாண் பராட் அவ்னா.
(மொட்டான் ராக் அவளுன்னங்கோ. திசநிமேனி பல்கீஷ்டு மொரோஜோல் சங்கரியோ)
பல்கீஷ்டுக் ஹாத்பைன் தமைரியோனி. கன்னடி சொம்மர் ஹிப்பி தொஸ்கோ ஒருப்பிலராஸ். தாத் தொன் சீலராஸ். தெனோ கெரறியோ சீத்தி தேகோ பாபு மாயின் டக்கிளிடியாஸுன். திடீர்கேறி தேகோ பாடுக கீத் கவரஸ். மொட்டோ டி.எம்.எஸ். மெனி ஹவ்டன்.
திச இச கெரி ஒண்ட பெட்கி தேக்கடத்த ஜியாஸ். அபார் திபார் அவுன்டி பிள்சார் கெத்தியோ. கோன்? பல்கீஷ்தூஸ். ஒண்ட ஹோகத் புரோக்கர் வேற பிரென்ட் கெள்ளிட்ராஸ். (ஹோகத் ப்ரோக்கர் மெனத் கலாரச்யா? மெடிக்கல் ரெப். காம் பூரா அவர பெட்கான் எம்.காம். பி.எஸ்ஸி. சொவ்திதி வீத் ஹிண்ட்ரியொ தென்கோ ஹோகத் புரோக்கர் காமுஸ் அப்பை மெனி தொஸ்க்ரும் லிக்கி தொவ்ரஸ்.) தேகோஜோல்ரீ மொட்டோ பொண்டி (லாரி நா பைக்) மயி கல்டியோ. டோவ்டதோ கல்நாத்தோ கியர் குண்டக்க மண்டக்க தாயி உசிளிபோடி டொவ்டரஸ்.
பெட்கி கேர் ஜி செரியாஸ். தெள்ளத் மொட்டோ மேங்கான் அஸ்கி தேனுன் கள்ள பிசில்டியா. நொவ்ராக் ஒண்ட மடக்கு சேர் அணி தியாசுன். பீஸ் மேனதிக்காம் பல்கீஸ்து ராஜான் பிசரியோசொன் பிசில்டியோ.
பவண்டோ அணி தியாசுன். ஒண்ட ஜுருணி. பூரா பவண்டோ போதூர் ஜி செரெஸ். லொவ்த்த சேத்த பிள்ளலுன் அஷ்கோ ஐஷ்து சோன் பீத்தியோ நௌரோ மெனி அசியாசுன். பல்கீஸ்து தெள்ள பூர ஜாலிகோ கல்லிடியோ.
நௌரி பொள்ளி அவோ மெனி ப்ரோக்கர் சங்கயோ. தொன் பூரா தாத்கொன் பல்கீஸ்து பிசி ஒதாஸ். (ஒண்ட இவர் காயோ மெனத் பல்கீஸ்து வரோ அனைத் ஹுடி ஜெடை. தெள்ள மாதிரி ஆங்கு. பெடிகின் வேணும் தைலறியோ ரப்பர் பான்ட் தேகோ பெல்டு.) ஆனா பெட்கி தாட்சன்யங்கோ தெல்கோகொ கொட்டோ பொரொரியொ சோன் பிசிஸ்.
பல்கீச்துக் தோலோ அந்தார் போல்டியோ. அத்து கெண்டோ லெங்கு தேகோ காய் சலறியோ மெனி கொன்னி ஐக்கனி.
கோம்மோ அவி அம்போ ப்ரோக்கர் பாவோ, மாய் பபூன் புசியாசுன்.
"kaai raa பாபு. பெட்கி ஒப்பாரச்யா?
அவரையோ ராகும் பல்கீஸ்து "காய் கலரியோயாஹ். பெட்கி தெக்காத் மெநதி பெல்மெனி பொள்ளி அவி தெக்கடராசுன்."
"உவ்வோ தெல்கோ சே. கெண்டோ ஆங்கும் லேஸ்கொ வேன் சே. தொர பாபு மாயனுக் பவி மாதிரி தெக்காய்."
ஆங்கும் கெண்டோ உவ்வோ வேன் யா? ஆங்கு போர் கெண்டோ தவிர கொன்னி நீம்பா ... தேனோ மொற பாபு மாயனுக் ஒண்ட பவி கோ தெக்கானா மோகோ மெல்லி பவி மாதிரி தெக்காய். மோகோ அத்தோ ஹோராத் நோக்கோ சொடுவோ. இசனி மெந்தி சிள்ளபாத் கைத்தி சைனா அவுன்டி அப்புனாத்தேனோ சொன் கெல்லிடியோ...
துமி நியாவ் சங்குவோ. உவ்வோ தெல்கோ ராறியோ சொக்கடூச்னா.
Subscribe to:
Post Comments (Atom)
No comments:
Post a Comment